ឯកឧត្តម ហង់ ជួនណារ៉ុន ចែករំលែកបទពិសោធន៍តាមរយៈការបោះពុម្ពនិងផ្សព្វផ្សាយសៀវភៅស្ដីពីសេដ្ឋកិច្ចកម្ពុជា
30-December-2015 | ដោយ មួយឡា
ភ្នំពេញ៖ រដ្ឋមន្ដ្រីក្រសួងអប់រំ យុវជន និងកីឡា ឯកឧត្តមបណ្ឌិត ហង់ ជួនណារ៉ុន នៅថ្ងៃទី២៩ ខែធ្នូ ឆ្នាំ២០១៥ បានចែករំលែកនូវបទពិសោធន៍ជាច្រើនដែលលោកធ្លាប់ឆ្លងកាត់ជាច្រើនឆ្នាំនៅក្រសួងសេដ្ឋកិច្ច និងហិរញ្ញវត្ថុជាង១៥ឆ្នាំមកនេះ និងបទពិសោធជាច្រើនទៀតបង្ហាញជូនដល់មហាជនទាំងអស់តាមរយៈសៀវភៅស្ដីពី «សេដ្ឋកិច្ចកម្ពុជា» ។
ឯកឧត្តមរដ្ឋមន្ដ្រី បានថ្លែងក្នុងកម្មវិធីផ្សព្វផ្សាយសៀវភៅ «សេដ្ឋកិច្ចកម្ពុជា» នាសាកលវិទ្យាល័យជាតិគ្រប់គ្រងថា សៀវភៅនេះបានផ្ដោតសំខាន់ទៅលើការអភិវឌ្ឍគ្រប់ផ្នែកតែម្ដង មានទាំងពីប្រជាជនម៉ាក្រូសេដ្ឋកិច្ច កសិកម្ម ឧស្សាហកម្ម ហេដ្ឋារចនាសម្ព័ន្ធ ធនធានមនុស្សអប់រំ សុខាភិបាល និងផ្សេងៗជាច្រើនទៀត ជាពិសេសជុំវិញអាស៊ានតែម្ដង ។
ឯកឧត្តមរដ្ឋមន្ដ្រីបន្ដថា «សៀវភៅដែលខ្ញុំបាននិពន្ធនេះគឺបង្ហាញពីតួនាទីរបស់សម្ដេចតេជោ នាយករដ្ឋមន្ដ្រីកម្ពុជាក្នុងការសម្រេចបាននូវសន្ដិភាពនៅកម្ពុជា ពិសេសសន្ដិភាពអំឡុង ឆ្នាំ១៩៩៨-១៩៩៩ ចឹងបើគ្មានសន្ដិភាពនេះទេ យើងមិនអាចអនុវត្ដបានទេ ទី២ ចែករំលែកនូវបទពិសោធន៍ដែលខ្ញុំបានបំពេញការងារជាង ១៥ឆ្នាំ នៅក្រសួងសេដ្ឋកិច្ច និងហិរញ្ញវត្ថុនិងពីការចងក្រងសៀវភៅមួយក្បាលនេះ ឲ្យយុវជនកម្ពុជាបានយល់ដឹងតើការអភិវឌ្ឍនេះវាឆ្លងកាត់ដំណាក់កាលអីខ្លះ បញ្ហាប្រឈមអ្វីខ្លះ ហើយកត្ដាអ្វីខ្លះដែលឲ្យយើងអភិវឌ្ឍន៍បានល្អប្រសើរ តើថ្ងៃមុខទៀតមានបញ្ហាអ្វីខ្លះដែលធ្វើឲ្យយើងចេះដោះស្រាយ ដើម្បីឈានទៅរកការអភិវឌ្ឍថ្មីទៀត»។
ឯកឧត្តមបានថ្លែងបន្ដទៀតថា «សំខាន់បំផុតសៀវភៅនេះអ្វីដែលខ្ញុំចង់បង្ហាញជាងគេនោះ គឺអាស៊ាន ឲ្យប្រជាជនកម្ពុជាយល់កាន់តែច្បាស់ដើម្បីឲ្យដឹងថា កម្ពុជាចូលសមាហរណកម្មអាស៊ានចុងឆ្នាំ២០១៥នេះ យើងចំណេញនិងបាត់បង់អ្វីខ្លះនោះ ពិសេសចរន្ដលំហូរចេញចូលទៅវិញទៅមកទាំងការងារធនធានមនុស្ស និងទំនិញ ក្នុងកំឡុងពេលនោះដែលចំណេះដឹងទាំងអស់នៅខាងក្រោយគេសៀវភៅនេះតែម្ដង »។
ជាងនេះទៅទៀត សៀវភៅសេដ្ឋកិច្ចនៃប្រទេសកម្ពុជាជាមាគ៌ាឆ្ពោះទៅអនាគតដ៏ភ្លឺស្វាង វឌ្ឍនភាព បញ្ហាប្រឈម និងទស្សនវិស័យទៅអនាគតគឺជាការខិតខំដ៏ក្លាហានមួយដើម្បីបកស្រាយនិងពន្យល់ពីដំណើរនៃវិវឌ្ឍន៍សេដ្ឋកិច្ចកម្ពុជា ក្នុងរយៈពេល ២ទសវត្សរ៍កន្លងមកនូវទិដ្ឋភាពនៃកែវភ្នែករបស់អ្នកនិពន្ធ ដែលជាអ្នកសិក្សាស្រាវជ្រាវផងនិងអ្នកអនុវត្ដផ្ទាល់ផង។
គួរបញ្ជាក់ថា សៀវភៅស្ដីពី «សេដ្ឋកិច្ចកម្ពុជា» របស់លោករដ្ឋមន្ដ្រីក្រសួងអប់រំ យុវជន និងកីឡា បានចំនាយពេលអស់ប្រមាណជាង១០ឆ្នាំ អំឡុងពេលលោកធ្វើការតែម្ដង ហើយចំពោះពេលវេលាស្រាវជ្រាវតាំងពីលោកនៅជានិស្សិតមកម្ល៉េះ ដោយផ្ដោតសំខាន់ទៅលើបញ្ហាសេដ្ឋកិច្ចកម្ពុជានេះដែលមានជាភាសាអង់គ្លេសជាង ៣០០ទំព័រ និងជាភាសាខ្មែរជាង ៥០០ទំព័រ៕ ដោយ មែន កំសត់
ចំនួនអ្នកទស្សនា
- ថ្ងៃនេះ4391
- ម្សិលមិញ14181
- សប្តាហ៍នេះ4391
- ខែនេះ119541
- ឆ្នាំនេះ119541
- សរុប20561997